YA-MARERE AHOKHWA NSANA

Ramos Arineshito Nakhuwo, Ya-Marere, akhwiyé nsana nihiku na 9, mweri wa Agosto, mwakha yola wa 2010, Oshipiritali Yulupale ya Wa-Mphula. Sovira mieri miraru yawereyiwa’ya mmirimani, ahivonaka, amalelaka akhwaka nsana vavo vàsisu.

Yawo avithiwé olelo, nihiku na 10, mweri wa Agosto, 2010, omahiyeni aniphwanyaneya wattamela owannyaya, ephiro yo Murupula, okhummwaka muttetthe Wa-Mphula. Onákhwani, yariwo atthu anjene a mmawani, anashikola ni anamalaka w’Èshikola Yulupale Lurio (Univerisitati Lurio), Mamwene makina a Wa-Mphula, aFerau (Namalaka Mulupale w’Èshikola Yulupale Lurio) nave-thoYa-Namwakha, Muhóleli a Conselho Munisipali a Muttetthe a Wa-Mphula.

Okhuma mwakha wa 2007, Ya-Marere yanihimmwa vanjene pahi, muteko yilipeherya’ya akhaliheryaka opattushiwa ni wettiherya ohólo Eshikola Yulupale Lurio. Anashikola othene, anamalaka w’Èshikola Yulupale Lurio, Namalaka’aya Mulupale, atthu a mmawani nave-tho a mmuttetteni a Wa-Mphula, othene yan’òná muteko w’orera’sha, yilipiherya’ya ovara Ya-Marere. Okhuma okathi s’árerehiwa’ya nave s’atekiwa’ya inupa, mphaka nihiku na 29, mweri wa Junyo, mwakha wa 2007, wa henlya’ya makeya, mwaha wa nìra n’òpajeriha ovara muteko w’Èshikola’ene yeyo, Ya-Marere khayitthyunwe pahi wettelela muhakhu yola mulupale ori Eshikola Yulupale Lurio. Namalaka Mulupale Ferau, anamalaka akina ni anashikola, ni atthu a mmawani yanishukhuru vanjene miruku s’aya Ya-Marere mwaha wa Muteko òwettiherya oholo Eshikola Yulupale Lurio. Atthu anjene yari onákhwani, yupuwela muteko yola orera avarale’aya Ya-Marere.

Othene, nimuvekeleke Mwanene Muluku awakheleke ya-Marere, omwene’ni mwa’ya. Nihiku na 10, Mweri wa Agosto, Mwakha wa 2010. (Elempwé ni Pèturu Mwana-aCouto)

WAMPHULA FAX – 11.08.2010